Plantun de Prouvènço

Pèr coumpara dos planto d'encò nostre

Ophrys passionis & Abies alba

Ophrys passionis

Orchidaceae

Nom en français : Ophrys de la passion.

Descripcioun :
Aquest Ophrys fai parti dóu group dis aragno. Es uno meno pulèu coumuno dins la garrigo e li tepiero seco de Prouvènço de tremount. La petalo d'en bas (labreto) èi sourno e tant larjo que longo. Lou ginostème fai un angle de 40 à 70° emé la labreto ço que fai la diferènci emé Ophrys exaltata (70 à 90°). Ophrys aranifera à lou champ de la baso de la labreto mai clar.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 15 à 40 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Ophrys
Famiho : Orchidaceae

Ordre : Asparagales

Coulour de la flour : Brunello
Petalo : irreguliero
Ø (o loungour) flour : Pancaro entresigna
Flourido : Printèms

Sòu : Ca
Autour basso e auto : Pancaro entresigna
Aparado : Noun

Liò : Champ - Tepiero seco - Garrigo
Estànci : Termoumediterran à Coulinen
Couroulougi : Pancaro entresigna
Ref. sc. : Ophrys passionis Sennen, 1926

Sapin

Abies alba

Pinaceae

Àutri noum : Sap, Sapino, Abet, Sapi.

Noms en français : Sapin pectiné, Sapin blanc.

Descripcioun :
Pèr pas s'engana emé la serento fau regarda coume soun lis aguio o peréu li pigno (o vacheto). Li fueio dóu sapin soun tóuti dins lou meme plan coume un penche, au contro de li de la serento que soun estacado tout à l'entour de la ramo coume uno brosso. De nouta pamens qu'acò marcho pas pèr d'ùni sap fourestié (coume Abies pinsapo). Li pigno, quouro li poudès vèire, se tènon bèn drecho, alor qu'encò de la serento pendoulon.

Usanço :
La pegoulo (bijoun) dóu sapin èi di proun vulneràri. Ero acampado emé de boutihoun coupa en biais e tanca dins li bosso de la rusclo (O. Madon). S'emplegavo en emplastro sus lis estorso (P. Lieutaghi) o dins li tisano contro lou toussi.